السجائر الإلكترونية والمرض الغامض!!

الدنيا مقلوبة بقالها كام يوم على السجائر الإلكترونية .. هي إيه الحكاية؟
الحكاية باختصار أنه تم تسجيل أول حالة وفاة نتيجة مرض غامض يصيب الجهاز التنفسي والرئة وظهور 193 حالة أخرى يتوقع أن تكون مصابة بنفس المرض! .. وبعد التحقيق والفحص تبين أن هذا المرض الغامض نتيجة تدخين السجائر الإلكترونية!
السي إن إن والبي بي سي والواشنطن بوست ورويترز وكل مواقع الأخبار العالمية بتتكلم .. حالة استنفار في 22 ولاية أمريكية .. تحذيرات في الإدارات الصحية الحكومية بالإبلاغ عن أي حالة مشتبه فيها (أي إصابة رئوية .. صعوبة في التنفس وألم في الصدر أو ضيق تنفس .. مصحوبة بحمى وسعال وقيء وإسهال وتكون الحالة مدخنة للسجائر الإلكترونية) ..  حملات توعية ضخمة على السوشيال ميديا بخطورة الـVaping!

في يناير 2018 تقرير الأكاديميات الوطنية للعلوم والهندسة والطب حذر من خطورة السجائر الإلكترونية وقال: "على الرغم من أن السجائر الإلكترونية أقل ضررا إلا أنها تسبب مشكلات صحية تستدعي القلق!" .. بعدها تم تسجيل حالات من 18 : 49 سنة لديها أعراض تشبه عدوى فيروسية أو التهاب رئوي جرثومي إلا أن الحالات دي على الرغم من تلقيها العلاج المناسب عانى بعضهم من قصور في الجهاز التنفسي ووضعهم على أجهزة التنفس الصناعي حتى أصبحت أقصى آمالهم أنهم يستغنوا بس عن جهاز التنفس الصناعي!
المشكلة أن لغاية دلوقتي مش عارفين إيه المرض الغريب؟ .. وبالتالي مش عارفين له علاج؟ .. ومش عارفين المشكلة في أجهزة السيجارة الإلكترونية ولا في المادة نفسها .. ومش متأكدين حتى إذا كانت المشكلة دي بتظهر على المدى الطويل ولا لا .. كل اللي متأكدين منه أن في خطورة كبيرة جدا على صحتك بسبب تدخين السجائر الإلكترونية تصل إلى درجة الوفاة!

منشن صاحبك اللي بيدخن سجائر إلكترونية وحذره .. قوله ماتفرحش بالبخار الكثيف اللي بتطلعه .. مش هيبقى شكلك روش ولا حاجة .. ومش هتنفعك الروشنة لما تقعد على جهاز التنفس الصناعي بقية حياتك أو تموت! .. خذ قرار من دلوقتي وخليك راجل مع نفسك وبطلها.